Jón Bjarnason landbúnaðar- og sjávarútvegsráðherra og Guðmundur Jóhannesson stjórnarformaður Selaseturs Íslands við undirritun síðasta sunnudag (29. ágúst)

Selasetur Íslands og sjávarútvegs- og landbúnaðarráðuneytið hafa nú gert með sér samkomulag um að rannsóknir á sel við Ísland og verkefni honum tengd verði framvegis í umsjón Selaseturs Íslands. Rannsóknirnar verða eftir sem áður og eins og ástæða þykir til samstarfsverkefni stofnana sjávarútvegs- og landbúnaðarráðneytisins. Einnig verða kallaðir til ýmsir hagmunaðilar eftir því sem þurfa þykir. Auk rannsókna á líffræði og lífsháttum sela mun setrið m.a. rannsaka áhrif selveiða á selastofna og skoða hvort og með hvaða hætti sé rétt að setja reglur um slíkar veiðar.

Í samkomulaginu kemur einnig fram að Selasetri Íslands sé falið að skipuleggja og annast kennslu, námskeiðahald og aðra fræðslu um seli við Ísland, eftir atvikum í samstarfi við sjávarútvegs- og landbúnaðarráðnuneytið, stofnanir þess og hagsmunaaðila. Þá er gert ráð fyrir að setrið sjái um fjármál og ráðningar rannsóknamanna og annarra starfsmanna. Gert er ráð fyrir að sjávarútvegs- og landbúnaðarráðnuneytið hafi yfirumsjón með framangreindum verkefnum en að miðstöð fyrir starfsemina verði hjá Selasetri Íslands á Hvammstanga. Umfang og framkvæmd þessara verkefna byggist á að framlög fáist til þeirra á fjárlögum.

Ráðherra heimsækir selaskoðunarstaðinn á Illugastöðum (Guðmundur Jóhannesson bóndi á Illugastöðum, Ársæll Daníelsson stjórnarmaður SÍ, Jón Bjarnason ráðherra, Sandra M. Granquist sérfræðingur í selarannsóknum, Hrafnhildur Ýr Víglundsdóttir framkvæmdastjóri, Kristín Jósefsdóttir stjórnarmaður SÍ, Laila Aranda Romero sjálfboðaliði í selarannsóknum, Ester Sanchez sjálfboðaliði í selarannsóknum og Ingimar Jóhannsson skrifstofustjóri landbúnaðar- og sjávarútvegsráðuneytis).,